Днесь светло красуется святая обитель Оранская / яко зарю солнечную восприимши Владичице / чудотворную Твою икону / к нейже ныне мы притекающе и молящеся  Тебе  взываем сице: / о Пречудная Владычице Богородице, / молися из Тебе воплощенному Христу Богу нашему / да избавит святую обитель сию / и вся грады и веси страны христианские / невредимы от всех навет вражиих / и спасет души наша // яко милосерд.

Мати Всечистая, Пресвятая Владычице Неба и земли спаси нас грешных! 

МОЛИТВА ВЛАДИМИРСКОЙ – ОРАНСКОЙ ИКОНЕ БОЖИЕЙ МАТЕРИ. 

О Всемилостивая Госпоже Богородице, Небесная Царице, Всемощная Заступнице, непостыдное наше упование! Благодарим Тя о всех благодеяниях российским людем от Тебе бывших, от древле и до днесь от чудотворныя иконы Твоея явленных. И ныне, Преблагая Владычице, призри на ны грешныя и недостойныя рабы Твоя, яви нам милость Твою и моли Сына Твоего Христа Бога нашего, о еже избавитися нам от всякаго зла и сохранитися царствующим градом, всякому граду и веси, и всей стране нашей от глада, губительства, труса, потопа, огня, меча, нашествия иноплеменник и междоусобныя брани. Испроси благоденственное и мирное житие всем православным христианом, здравие, долгоденствие, во всем благое поспешение и спасение. Сохрани и умудри пастырей церкви, еже достойно пасти стадо Христово и право правити слово истины: укрепи христолюбивое всероссийское воинство, подаждь дух совета и разума военачальником, градоначальником и всем иже во власти суть: ниспосли святое Твое благословение и всем православным христианом, покланяющымся и молящымся Ти пред цельбоносною Твоею иконою. Буди нам Заступница и Ходатаица пред престолом Всевышняго идеже предстоиши. К кому убо прибегнем, аще не к Тебе, Владычице; кому принесем слезы и воздыхания аще не к Тебе, Пресвятая Богородице; не имамы бо иныя помощи, не имамы иныя надежды, разве Тебе, Небесная Царица. Под Твой покров притекаем, молитвами Твоими ниспосли нам мир, здравие, земли плодоносие, воздуха благорастворение, избави ны от всяких бед и скорбей, от всяких недугов и болезней, от внезапныя смерти и от всех озлоблений и врагов видимых и невидимых. Вразуми и научи ны, о Всемилостивая Заступнице, како безгрешно прейти путь земнаго сего жития: Ты веси немощи наша, веси и согрешения наша, но и веру веси, и упование видиши: даруй же нам исправление греховныя жизни и умягчи злая сердца наша. Укрепи в нас правую веру, вложи в сердца наша дух страха Божия, дух благочестия, дух смирения, терпения и любве, в добрых делех преуспеяние: избави же ны от искушений, от пагубных душевредных учений, от неверия, развращения и погибели вечныя: Тебе убо просим, Пречистая Владычице, и припадающе пред святою Твоею иконою, молимся, умилосердися на ны и помилуй ны, в страшный же день суда ходатайством и заступлением Твоим сподоби ны стати одесную Сына Твоего, Христа Бога нашего, Ему же подобает всякая слава честь и поклонение, со Безначальным Его Отцем, и Пресвятым и Благим и Единосущным Его Духом, ныне и присно, и во веки веков. Аминь.

Фото Всенощного бдения в канун престольного праздника в обители.